శంకరాభ(పూ)రణం - భల్లూకము చదువుకొనగ బడిలో జేరెన్...

శ్రీ కంది శంకరయ్య గారు "శంకరాభరణం" బ్లాగునందు 25 - 03 -2011 న ఇచ్చిన  సమస్యకు నా పూరణ.

           సమస్య: భల్లూకము చదువుకొనగ బడిలో జేరెన్

కం:   చల్లా,అల్లం వారలు
        పిల్లల్నే ముద్దుపేర్ల పిలుతురు; వారే
        లల్లీ,పప్పీ,బంటీ,
        భల్లూకము; చదువుకొనగ బడిలో జేరెన్!

శంకరాభ(పూ)రణం - మందు జనుల కెల్ల విందు గాదె .....

శ్రీ కంది శంకరయ్య గారు "శంకరాభరణం" బ్లాగునందు 24 - 03 -2011 న ఇచ్చిన  సమస్యకు నా పూరణ.

                           సమస్య :  మందు జనుల కెల్ల విందు గాదె

ఆ.వె:  బంధ మున్న వారు బంధుజనులు గాన
          మందు త్రాగు వారు మందు జనులు,
          సబ్సిడీల నిచ్చి సారాయి పోసిన
         'మందుజనుల ' కెల్ల విందు గాదె! 

శంకరాభ(పూ)రణం - శ్రీరాముని జూచి సీత ఛీ కొట్టె....

శ్రీ కంది శంకరయ్య గారు "శంకరాభరణం" బ్లాగునందు 23 - 03 -2011 న ఇచ్చిన  సమస్యకు నా పూరణ.

             సమస్య :  శ్రీరాముని జూచి సీత ఛీ కొట్టెగదా

కం:  ఆ రావణుడరుదెంచగ,
       మారాడక గరిక బట్టి మధ్యన, యెన్నో
       మారులు మది దలచి తలచి
       శ్రీరాముని; జూచి సీత ఛీ కొట్టెగదా! 

శంకరాభ(పూ)రణం - నరసింహుని పూజ చేసె నరకాసురుడే.

శ్రీ కంది శంకరయ్య గారు "శంకరాభరణం" బ్లాగునందు 22 - 03 -2011 న ఇచ్చిన  సమస్యకు నా పూరణ.

             సమస్య : నరసింహుని పూజ చేసె నరకాసురుడే

కం:  నరరూప రాక్షసుండే, 
       నరులను తా డబ్బు కొరకు నరికెడి ఘనుడే!
       నర ఘోష తీర వలెనని
       నరసింహుని పూజ చేసె నరకాసురుడే!! 

శంకరాభ(పూ)రణం - పోలేరమ్మను నుతింప ముప్పు .....

శ్రీ కంది శంకరయ్య గారు "శంకరాభరణం" బ్లాగునందు 21 -03 -2011 న ఇచ్చిన  సమస్యకు నా పూరణ.

                సమస్య : పోలేరమ్మను నుతింప ముప్పు గలుగురా

(ఈ మధ్య కొన్ని భక్తి గీతాలు వింటుంటే మూలంలోని పాట గుర్తుకు వస్తుంది తప్ప భక్తి భావం గలుగదు.భక్తి లేని నుతులు ముప్పు అని నా భావం) 


కం :  'లేలే నారాజా',మరి
        'లేలేరా తిరగబడుము' లెమ్మను,పాటల్
         మేలేయని పేరడితో
         పోలేరమ్మను నుతింప ముప్పు గలుగురా!

శంకరాభ(పూ)రణం - అవధానం బొనరించి పామరుడయెన్ ఖ్యాతుండు....

శ్రీ కంది శంకరయ్య గారు "శంకరాభరణం" బ్లాగునందు 20 -03 -2011 న ఇచ్చిన  సమస్యకు నా పూరణ.

               సమస్య :  అవధానం బొనరించి పామరుడయెన్ ఖ్యాతుండు విద్వత్సభన్

మ: కవనోత్సాహము గల్గజేసి గురువుల్ కౌశల్యమే బెంచగా,
      శివసంకల్పము ధారణే సలుపగా, శ్రీ భారతీ సత్కృపన్
      లవ లేశంబును తొట్రు పాటు పడకన్ రంజింపజేసెన్ గదా
      అవధానం బొనరించి, పామరుడయెన్ ఖ్యాతుండు విద్వత్సభన్.

శంకరాభ(పూ)రణం - వన్నెలే తెల్లబోయిన వింత గనుడు..

శ్రీ కంది శంకరయ్య గారు "శంకరాభరణం" బ్లాగునందు 20 -03 -2011 న ఇచ్చిన  సమస్యకు నా పూరణ.

                  సమస్య :  వన్నెలే తెల్లబోయిన వింత గనుడు

తే.గీ :  పంచ వన్నెల చీరెను పట్టుకొచ్చి
         భార్య కిచ్చితి, పండుగ బహుమతిగను!
         కాల మేమందు? ఒకసారి కట్టి, ఉతుక
         వన్నెలే తెల్లబోయిన, వింత గనుడు! 

శంకరాభ(పూ)రణం - తిరుమలేశుని దిట్టిన సిరులు గలుగు..

శ్రీ కంది శంకరయ్య గారు "శంకరాభరణం" బ్లాగునందు 19 -03 -2011 న ఇచ్చిన  సమస్యకు నా పూరణ.

                      సమస్య :  తిరుమలేశుని దిట్టిన సిరులు గలుగు

తే.గీ : చూడ తిట్టగు "రా" యన్న; చోద్య మదియె!
         భక్తియుప్పొంగ నార్తితో  భజన సలిపి
         ఆదు కొనుము 'రా'!యీయ'రా'! అభయ మనుచు
         తిరుమలేశుని దిట్టిన సిరులు గలుగు !!

శంకరాభ(పూ)రణం - సింహము నెదిరించి గ్రామ సింహము గెలిచెన్..

శ్రీ కంది శంకరయ్య గారు "శంకరాభరణం" బ్లాగునందు 18 -03 -2011 న ఇచ్చిన  సమస్యకు నా పూరణ.


          సమస్య :  సింహము నెదిరించి గ్రామ సింహము గెలిచెన్

కం : సింహళ జట్టును జూడగ
       సింహమె క్రిక్కెట్టునందు, చిన్నది  కెన్యా !
       'సంహౌ'గెలిచిన - అనెదము
       సింహము నెదిరించి గ్రామ సింహము గెలిచెన్!!


        సమస్య :  సింహమును జయించెను గ్రామ సింహ మొకటి


తే.గీ :  బొమ్మ కథలను వేసెడు పొత్తమందు
        "కండ బలము నధిగమించఁ గలదు తెలివి"
         అనుచు చెప్పెడు కథ గంటి, నందులోన
         సింహమును జయించెను గ్రామ సింహ మొకటి.

శంకరాభ(పూ)రణం - మాధవుడు మాధవుని తోడ మత్సరించె..

శ్రీ కంది శంకరయ్య గారు "శంకరాభరణం" బ్లాగునందు 17 -03 -2011 న ఇచ్చిన  సమస్యకు నా పూరణ.

                  సమస్య :  మాధవుడు మాధవుని తోడ మత్సరించె

తే.గీ :  లింగ రూపము నందున లీల జూపి
         ఆది యంతము  లేకుండ నట్లె నిలువ
         మొదలు గానక నప్పుడు మ్రొక్కె; ఎపుడు
         మాధవు  డుమాధవుని తోడ మత్సరించె?  

శంకరాభ(పూ)రణం - నెల వంకన్ జూచి నవ్వ నేరము .....

శ్రీ కంది శంకరయ్య గారు "శంకరాభరణం" బ్లాగునందు 16 -03 -2011 న ఇచ్చిన  సమస్యకు నా పూరణ.

            సమస్య : నెల వంకన్ జూచి నవ్వ నేరము సుమ్మీ

కం:  విలువగు ప్రేమకు అర్థము
       తెలియకనే; ఒళ్ళు బలిసి తెలుపుచు గొప్పల్!
       వలపుల పేరున నిటు క
       న్నెల వంకన్ జూచి నవ్వ, నేరము సుమ్మీ! !

శంకరాభ(పూ)రణం - శ్రమము నందు మనకు శాంతి దొరకు .....

శ్రీ కంది శంకరయ్య గారు "శంకరాభరణం" బ్లాగునందు 15 -03 -2011 న ఇచ్చిన  సమస్యకు నా పూరణ.

                 సమస్య : శ్రమము నందు మనకు శాంతి దొరకు

ఆ.వె : దేహ వాంఛ  వదలి, దేవుని ధ్యానంబు
          సతత మచట సలిపి, సాధకులకు
          నుచిత రీతిని, తగు యుద్బోధ జేయునా
          శ్రమము నందు మనకు శాంతి దొరకు!

ఆ.వె : ఆడ పిల్ల 'శాంతి ' నారు యేండ్ల క్రితము
          వదలి వెళ్ళినాము వలదననుచు!
          మనసు మారె నిపుడు, మాత సులక్షణా
          శ్రమము నందు; మనకు "శాంతి" దొరకు!!

శంకరాభ(పూ)రణం - అర్జునునకు మిత్రు డంగ రాజు .....

శ్రీ కంది శంకరయ్య గారు "శంకరాభరణం" బ్లాగునందు 14 -03 -2011 న ఇచ్చిన  సమస్యకు నా పూరణ.

                            సమస్య :  అర్జునునకు మిత్రు డంగ రాజు

ఆ.వె :  "కదన మందు నేను కాలుని గానౌదు
             నర్జునునకు" - మిత్రు డంగ రాజు
             బాస చేతు ననుచు బాహాటముగ జెప్పె
             రాజరాజు కపుడు రాజ సభను. 

శంకరాభ(పూ)రణం - బావా రమ్మని పిల్చె మోహ మెసగన్ బాంచాలి .....

శ్రీ కంది శంకరయ్య గారు "శంకరాభరణం" బ్లాగునందు 13 -03 -2011 న ఇచ్చిన  సమస్యకు నా పూరణ.

                     సమస్య :  బావా రమ్మని పిల్చె మోహ మెసగన్ బాంచాలి రాధాత్మజున్

శా : ఈవేళన్! మరి ప్రేక్షకాదరణకై! ఇవ్వాలి 'డ్రీంసాంగు' నే !
       ఏవో! ఓ తగు చిన్నమార్పు లిడుచున్!ఈ కర్ణ చిత్రంబులో
       ఓ వాటంబగు పాట!యంచు కలిపెన్నూహించి; ఆపాటలో
       బావా!రమ్మనిపిల్చె మోహమెసగన్ బాంచాలి రాధాత్మజున్!! 

ముంబాయి పై ఘాతుకం .. సంతాపం ..

ముంబాయి నగరంలో జరిగిన వరుస ప్రేలుళ్ళ లో మృతి చెందిన, క్షతగాత్రులైన వారికి సంతాపాన్ని సానుభూతిని ప్రకటిస్తూ ......

                                           సంతాపం

తే.గీ :  పొంచి ముంబాయి నగరాన పోటు పొడిచి

          ముంచి నారయ్యొ! నెత్తుటి ముద్ద లోన;

          నరకు మించిన వారిని నరుకు వారు

          నరుల లేరయ్య, రావయ్య నార సింహ!

శంకరాభ(పూ)రణం - ధనమె లక్ష్య మగును తాపసులకు .....

శ్రీ కంది శంకరయ్య గారు "శంకరాభరణం" బ్లాగునందు 13 -03 -2011 న ఇచ్చిన  సమస్యకు నా పూరణ.

                      సమస్య :  ధనమె లక్ష్య మగును తాపసులకు

ఆ.వె :  ధనము, దార, పుత్ర, దాయాదు లందున
           నితర భోగ మనిన నిచ్ఛ నిడరు,
           స్వార్థ చింత లేక, సతతము మోక్ష సా
           ధనమె లక్ష్య మగును తాపసులకు.

శంకరాభ(పూ)రణం - విగ్రహముల పైన నాగ్రహమ్ము .....

శ్రీ కంది శంకరయ్య గారు "శంకరాభరణం" బ్లాగునందు 11 -03 -2011 న ఇచ్చిన  సమస్యకు నా పూరణ.

                     సమస్య : విగ్రహముల పైన నాగ్రహమ్ము

ఆ.వె : నిగ్రహమును వీడి నేడు చూపితి వీవు
          విగ్రహముల పైన నాగ్రహమ్ము!
          విగ్రహముల? కావు? విజ్ఞత తోజూడ
          తాత,తాతతాత,తనువు లవియె!

ఆ.వె : నిగ్రహమును వీడి నేడు చూపితి వీవు
          విగ్రహముల పైన నాగ్రహమ్ము!
          నీదు తాత,మామ,స్నేహితుండును,భార్య
          ఆంధ్ర వారు కాగ అపుడు యెటుల?

ఆ.వె : నిగ్రహమును వీడి నేడు చూపితి వీవు
          విగ్రహముల పైన నాగ్రహమ్ము!
          చదువు నేర్పి బుద్ధి చక్కదిద్దిన ఒజ్జ
          నేమి జేతు వాంధ్ర నేల కాగ ? 

శంకరాభ(పూ)రణం - విస్కీయే మేలు విషము విఱుగుట కొఱకున్....

శ్రీ కంది శంకరయ్య గారు "శంకరాభరణం" బ్లాగునందు 11 -03 -2011 న ఇచ్చిన  సమస్యకు నా పూరణ.

              సమస్య : విస్కీయే మేలు విషము విఱుగుట కొఱకున్. 

కం:  చూస్కో! ముల్లును ముల్లున
        తీస్కో వచ్చును; విషమది తెలియగ విస్కీ!
        రాస్కో! ఆ  విధముగనే
        విస్కీయే మేలు, విషము విఱుగుట కొఱకున్!!

శంకరాభ(పూ)రణం - మెల్ల కన్ను వలన మేలు కలిగె .....

శ్రీ కంది శంకరయ్య గారు "శంకరాభరణం" బ్లాగునందు 10 -03 -2011 న ఇచ్చిన  సమస్యకు నా పూరణ.

                        సమస్య :  మెల్ల కన్ను వలన మేలు కలిగె. 


ఆ.వె :  బలినొసంగ నెంచి మాంత్రికుండొక్కడు
           మాటు వేసి పట్టి 'మంగ పతిని'
           వాని కళ్ళు చూచి, వదలెను వలదని
           మెల్ల కన్ను వలన మేలు కలిగె. 

శంకరాభ(పూ)రణం - దున్న పాలు పితికె సుందరాంగి .....

శ్రీ కంది శంకరయ్య గారు "శంకరాభరణం" బ్లాగునందు 09 -03 -2011 న ఇచ్చిన  సమస్యకు నా పూరణ.

                     సమస్య :  దున్న పాలు పితికె సుందరాంగి. 

ఆ.వె:  పాలు లేవు యింట! పాపాయి కిప్పుడు
         యెటుల? అనుచు నమ్మ యెదురు చూచె;
         ప్రొద్దు పోయి రాగ  పొలము జనిన గేదె,
         దున్న, పాలు పితికె సుందరాంగి.  

ఆ.వె:  పట్న వాసి యొకతె పల్లెటూరుకు వచ్చి
         ఆచట పితుకు చుండ అత్త పాలు;
         'నే' ననంగ , అత్త నిలుచుని గేదెముం
         దున్న, పాలు పితికె సన్నుతాంగి.

శంకరాభ(పూ)రణం - ఆడు వారిని తన్నుటే న్యాయ మగును

శ్రీ కంది శంకరయ్య గారు "శంకరాభరణం" బ్లాగునందు 08 -03 -2011 న ఇచ్చిన  సమస్యకు నా పూరణ.

                   సమస్య: ఆడు వారిని తన్నుటే న్యాయ మగును

తే.గీ:  బ్రతుకు తెరువుకు వచ్చిన పడతుల తన
          అమ్మ, చెల్లాయి,నక్కయ్య,నాత్మ మరచి
          ఆట బొమ్మగ భావించి, అమ్ము కొనుచు
          ఆడు వారిని; తన్నుటే న్యాయ మగును. 

శంకరాభ(పూ)రణం - పెండ్లి సేయ దగును ప్రేత మునకు.....

శ్రీ కంది శంకరయ్య గారు "శంకరాభరణం" బ్లాగునందు 07 -03 -2011 న ఇచ్చిన  సమస్యకు నా పూరణ.

                          సమస్య:  పెండ్లి సేయ దగును ప్రేత మునకు.    

ఆ.వె:  మాట వినని యెడల మరియొక విధమున
        ' పెండ్లి'జేతు మంద్రు పెద్ద లెపుడు;
         అంటి పెట్టు కొనుచు హడల గొట్టుచు నుండ
        ' పెండ్లి' సేయ దగును ప్రేత మునకు. 

శంకరాభ(పూ)రణం - కాశి కేగు వాడు ఖలుడు.....

శ్రీ కంది శంకరయ్య గారు "శంకరాభరణం" బ్లాగునందు 06 -03 -2011 న ఇచ్చిన  సమస్యకు నా పూరణ.


                        సమస్య :  కాశి కేగు వాడు ఖలుడు గాడె.

 
 ఆ.వె : ఈశు ధ్యాసను మది నింతైన దలుపక

           క్షేత్ర మహిమ దరికి  చేర నీక 

           తీర్థ యాత్ర గాక, స్వార్థయాత్ర కొరకు

           కాశి కేగు వాడు ఖలుడు గాడె.

శంకరాభ(పూ)రణం - తుందిలుని గని మన్మథుడని తొయ్యలి .....

శ్రీ కంది శంకరయ్య గారు "శంకరాభరణం" బ్లాగునందు 05 -03 -2011 న ఇచ్చిన  సమస్యకు నా పూరణ.

 సమస్య:  తుందిలుని గని మన్మథుడని తొయ్యలి మురిసెన్

కం:  ఇందుధరు నింతి, ముద్దిడి
       మందగమను శూర్పకర్ణు మాతంగ ముఖున్ !
       చిందులు వేయుచు తిరిగెడి
       తుందిలుని గని, మన్మథుడని తొయ్యలి మురిసెన్ !!

శంకరాభ(పూ)రణం - మడిగట్టిన శ్రోత్రియుండు మద్యము ద్రాగెన్.....

శ్రీ కంది శంకరయ్య గారు "శంకరాభరణం" బ్లాగునందు 04 -03 -2011 న ఇచ్చిన  సమస్యకు నా పూరణ.

           సమస్య: మడిగట్టిన శ్రోత్రియుండు మద్యము ద్రాగెన్.

కం:   'గుడిగంట ' నాటకంబున

         గుడిలో పూజారి పాత్ర 'గోపడు 'వేసెన్!

         సడి లేక మధ్య మధ్యన

         మడిగట్టిన శ్రోత్రియుండు మద్యము ద్రాగెన్!!

కం:  చెడు తిరుగుడు తిరిగెడు యొక

        గుడి అర్చకు చిన్న కొడుకు, కూడలి నడువన్

        పడి పడి నవ్వి జనులనిరి

        "మడిగట్టిన శ్రోత్రియుండు మద్యము ద్రాగెన్."

శంకరాభ(పూ)రణం - హర,హర,శంకరా,యనుచు నాలిని కౌగిట జేర్చె.....

శ్రీ కంది శంకరయ్య గారు "శంకరాభరణం" బ్లాగునందు 02 -03 -2011 న ఇచ్చిన  సమస్యకు నా పూరణ.

                  సమస్య :  హర,హర,శంకరా,యనుచు నాలిని కౌగిట జేర్చె బ్రేమతో.

ఒకప్పుడు భార్యపై శంకతో కొట్టిన భర్త తప్పు తెలుసుకొని చేరదీసిన సమయంలో
అన్న మాటలు.అతనికి హరా! అనటం అలవాటు.

చం:  కొరకొర జూచి కొట్టితిని కోపము తోడను శంకతో, హరా!
       చరచర ఈడ్చినాను నిను చావిడి బైటకు నాడు, నేటితో
       పొరలవి వీడి పోయినవి పొల్పుగ, నీయెడ యెంచనెప్పుడున్
       హర!హర! శంక; రా!యనుచు నాలిని కౌగిట జేర్చె బ్రేమతో. 

శంకరాభ(పూ)రణం - శిష్టు డెట్లు పల్కు శివ శివ యని.....

శ్రీ కంది శంకరయ్య గారు "శంకరాభరణం" బ్లాగునందు 02 -03 -2011 న ఇచ్చిన  సమస్యకు నా పూరణ.
     
                     సమస్య :  శిష్టు డెట్లు పల్కు శివ శివ యని

ఆ.వె :  హరికి భక్తు డయిన, ఆ వశిష్టాచారి
           హరుని నామ మొల్ల డనవరతము;
           శివుని రాత్రి నాడు చెప్పిచూచిననా వ
           శిష్టు డెట్లు పల్కు శివ శివ యని?

శంకరాభ(పూ)రణం - శంకరుం డొసంగు సంకటములు .....

శ్రీ కంది శంకరయ్య గారు "శంకరాభరణం" బ్లాగునందు 1 -03 -2011 న ఇచ్చిన  సమస్యకు నా పూరణ.      

                   సమస్య : శంకరుం డొసంగు సంకటములు

ఆ.వె:  శంక లొదలి మదిని సద్బుద్ధి గొల్చిన
          శంకరుం డొసంగు; సంకటములు
          దీర్చి దరిని జేర్చి,దేహయాత్రను జేయ
          చాలినన్ని సిరులు సౌఖ్యములను.