అందరికీ దీపావళి శుభాకాంక్షలు.
సీసము:
చిచ్చుబుడ్డియె నీదు జీవితమ్మును బుగ్గి
జేయగా మండుచు చిచ్చుబెట్ట
సీమ టపాకాయ చిన్నినీతలకాయ
ప్రేలిపొవుగనట్లు కాలిపోగ
చేరితారాజువ్వ మీరునీ బ్రతుకును
పైకి జేర్చుచు నింగి బాతిబెట్ట
విష్ణు, భూచక్రాలు విరిచినీకొమ్ములు
వీరంగమాడుచు విసరివేయ
ఆటవెలది:
నేటి దీపప్రభలు నిండగాబ్రతుకుల
కోరుకొనుచు లేచి కోలుకొనుచు
అందరమ్ముగలసి మందులన్ గాల్చుచు
బొంద బెడుదుమింక పో! కరోన!
కందము:
ఈ కోవిడ్ నరకునిపై
టీకాలను వేసి చంపు టెన్నడొ, నాడే
మాకౌ దీపావళియని
లోకమ్ములు వేచియుండె లోకేశ! హరీ!
కందము:
తెలుగది వాడిన "షేమని"
తెలివిగ "ఫీలవ్వ"బోకు తింగరి బుచ్చీ!
తెలుగది "వాడిన" షేమని
తెలియగ వికసించి కురియు తేనెలు గోలీ!
కందము:
"పని" ముట్టుకొనగ వలయును
పనిలేకను తిరుగకుండ బద్ధకమనుచున్
"పనిముట్టు" కొనగ వలయును
పనికవసరమైన వేళ వదలక గోలీ!
కందము:
తెగ మెరిసెడి యొక బంగరు
నగవేలే నీవు చూడ నలుగురిలోనన్
నగవే ముఖమున మాయక
తగనిలచిన, చేరనీక తగవుల గోలీ!
కరోనాపై పోరాటం....అంతర్జాతీయ కవితల పోటీ కొరకు వ్రాసిన పద్యాలు.
కందము:
మన మది కెయ్యది కష్టమొ
మనమది పరులకు సలుపుట మానగ వలెరా
మనవలె యొరులును జగతిని
మనవలెనని తెలిసికొనుచు మసలుము గోలీ!
