రవళి మాస పత్రిక (సెప్టెంబర్ 2025) లో ప్రచురితమైన పద్యములు.
"గోలీ" లు (97 - 103)
కందము:
ఈశ్వరు డొక్కడె జగతిని
నశ్వరుడై నిలచియుండు ననుచున్ మదిలో
విశ్వాసము తో గొల్చిన
విశ్వమ్మున నరుని బ్రోచు వినరా గోలీ!
కందము:
సందుల గొందుల మరి నీ
ముందరనే నిలచియుండు మురహరి యెపుడున్
సందియము వలదు నీకు ప
సందుగ తా గానుపించు సరిగన గోలీ!
కందము:
బడియే విద్యార్థుల కిల
గుడియగునట, గురువుగారు కుల దైవమ్మౌ
బడిపంతులు తనకే కన
బడినంతనె వందనమిడు ప్రభువే గోలీ!
కందము:
చక్కగ విశ్వాసమ్మును
కుక్కయె తా జూపుచుండు కొలదిగ కుడుపన్
మెక్కుచు నెంతయొ, సుంతయు
మక్కువ జూపని నరుడిక మందుడు గోలీ!
కందము:
తిట్టకు మోటమినెప్పుడు
మెట్టది విజయమ్ము జేర, మీదకు జనుచున్
నెట్టుము వెనుకకు దానిని
ముట్టెదవిక జయము, తీరు ముచ్చట గోలీ!
కందము:
జూదములాడిన నెపుడున్
రాదోయీ సిరుల మూట, రాజులె జనిరే
ఖేదము జెందుచు నడవికి
కాదనవారెవ్వరైన గలరే గోలీ!
కందము:
వాక్కను భూషణమున్న న
వాక్కగుదురు జూచు వారు వహ్వాయనుచున్
చక్కని పలుకుల ముందర
తక్కిన నగలన్ని గూడ తక్కువ గోలీ!
