శ్రీ పరాభవ నామ సంవత్సర ఉగాది శుభాకాంక్షలు.
(డిశంబరు, జులై, మార్చి, మే - అను ఇంగ్లీషు నెలల పేర్లను వాడుతూ తెలుగు సంవత్సరాదికి చెప్పిన స్వాగత పద్యం)
ఉత్పలమాల:
సాగిలి మ్రొక్కి భీతివిడి శంబరువైరికివైరి శంభుకున్
ఈ గతినుండె నామమని నెన్నక, భావిని మంచి రోజులై వేగమె నిన్నమొన్న గత పీడలకాలము మార్చివేయగా
స్వాగతమేను జెప్పెదను సత్ఫలమీయగ రా! పరాభవా!
మీకు మీ కుటుంబ సభ్యులకు అందరకు శ్రీ విశ్వావసు నామ ఉగాది శుభాకాంక్షలు.
"భావుక" FB సమూహము వారు నిర్వహించిన "క్రోధి" "ఉగాది కవితల పోటీ" లో బహుమతి పొందిన నా పద్యములు.
ఉత్పలమాల:
కాలము మీది గానితరి గష్టములెన్నియు సైపగావలెన్
గాలము వీడిపోవు, సరికాలము వచ్చి వసంతమందులే
సోలక రండు మీరనుచు, సోయగమొప్పగ గూసె కోయిలల్
జాలినిజూపి "క్రోధి" మము జక్కగ జూడుమ నీదు పాలనన్.
ఉత్పలమాల:
చప్పని జీవితమ్ములిక చప్పున మారగ జేయ బూనుచున్
రొప్పక తీపి చేదు వగరున్మరి బుల్పుయు నుప్పు కారమే
యొప్పిన లేహ్యమున్ దినుచు నుత్సహమంది యుగాదివేళలో
తప్పులు లేక సాగుడిక ధైర్యమునందుచు వెల్గు దారిలో.
అందరకు "క్రోధి"నామ నూతన సంవత్సర "ఉగాది" శుభాకాంక్షలు.
కందము:
క్రోధియను వత్సరము, వి
రోధములును జనుల కెపుడు రుజలే లేకన్
బాధలు దొలుగగ వలెనని
మాధవునే వేడుకొందు మనసున నెపుడున్.
సీసము:
ఉచిత తాయిలముల నూరింతయే తీపి
కరకు మాటలనుట కారమగును
మందు విందులనిచ్చు మచ్చికయే చేదు
బాసలెన్నియొ జేయు పలుకు వగరు
పోటిదారుని దిట్టు పోకడయే యుప్పు
బలుపు చేష్టలవియె పులుపు గదర
కాకులెన్నియొవచ్చు కోకిల కూతలన్
సంతగా నిదిగొ వసంతమనుచు
తేటగీతి:
ఎన్నికల పండుగది వచ్చె నెంచి మంచి
నాయకులకును మీ ఓటునయముగాను
వేయ రాష్ట్రమ్ము దేశమ్ము వెలుగులీని
ఐదునేడులు మీకింక "నగు" నుగాది.
మీకు మీ కుటుంబ సభ్యులకు అందరికీ
"శోభకృత్" ఉగాది శుభాకాంక్షలు
మీకు అందరికీ "ప్లవ" నామ తెలుగు వత్సర శుభాకాంక్షలు.
కం:
ప్లవనామపు వత్సరమా
నవ జీవనమిమ్మునేడు నయముగనీ మా
నవజాతి యరోగపు వి
ప్లవమును సాధించి జగతి బరగెడునట్లున్.
సీ:
మాస్కు బెట్టుకొనుట మామిడి వగరౌను
చింతవదలియుంట చింతపులుసు
భౌతిక దూరమ్ము బాటింపు కారమ్ము
ప్రీతినింటనెయుంట బెల్లమౌను
చేతులన్ గలుపక జేరుట వేప్పూత
కరముల శుభ్రమ్ము గనగనుప్పు
శిశిరమంతయునిండె చేటుకాలము వచ్చె
వత్సరమంతయున్ భయమునిండె
ఆ.వె:
ఆరుగాగలనివి యాచారముగ గల్పి
యనుసరించ శుభములందగలవు
ఆరుగా కరోన యనెడు రోగపునిప్పు
ప్రతిదినమునుగాది పండుగగును.
