కుత్తుకలు గోయువానికి కోటి నుతులు

శ్రీ కంది శంకరయ్య గారు ' శంకరాభరణం ' బ్లాగునందు 29-06-2011 న ఇచ్చిన సమస్యకు నా పూరణ.

సమస్య - కుత్తుకలు గోయువానికి కోటి నుతులు

తేటగీతి:
ధర్మ సంస్థాప నార్థమ్ము ధరణి యందు 
నవతరించుచు శిష్టుల నాదుకొనుచు
తప్పు దారిన బోయెడు దనుజకోటి 
కుత్తుకలు గోయువానికి కోటి నుతులు.

దుగ్ధపయోధి మధ్యమున దుమ్ములు రేఁగె నదేమి చిత్రమో

శ్రీ కంది శంకరయ్య గారు ' శంకరాభరణం ' బ్లాగునందు 28-06-2011 న ఇచ్చిన సమస్యకు నా పూరణ.



సమస్య - దుగ్ధపయోధి మధ్యమున దుమ్ములు రేఁగె నదేమి చిత్రమో 

ఉత్పలమాల: 


దగ్ధము జేతు నో నరక! దాగకు మాకసమందు పోరుమా !
దుగ్ధము త్రాగు బాలునని దూరకు! మిప్పుడె దుమ్ము రేపి సం 
దిగ్ధము దీర్తునంచు తల దీయగ కృష్ణుడు చక్ర మంపగా
దుగ్ధపయోధి మధ్యమున దుమ్ములు రేఁగె నదేమి చిత్రమో!!

మీసమ్ములు మొలిచెఁ గనుఁడు మీననయనకున్

శ్రీ కంది శంకరయ్య గారు ' శంకరాభరణం ' బ్లాగునందు 28-06-2011 న ఇచ్చిన సమస్యకు నా పూరణ.

సమస్య - మీసమ్ములు మొలిచెఁ గనుఁడు మీననయనకున్ 

కందము: 
"నా సుతునకు నూనూగుల 
మీసమ్ములు మొలిచెఁ గనుఁడు" మీననయనకున్
కాసింత గర్వ మేర్పడి 
చూసిన ప్రతి వార్కి జెప్పె చోద్యము గా తాన్.

గాడిద యేడిచెఁ గదన్న ఘనసంపన్నా!

శ్రీ కంది శంకరయ్య గారు ' శంకరాభరణం ' బ్లాగునందు 27-06-2011 న ఇచ్చిన సమస్యకు నా పూరణ.

 సమస్య - గాడిద యేడిచెఁ గదన్న ఘనసంపన్నా!

ఆటవెలది: 

ఆడిన మాటను దప్పగ
వేడుకగా దిరిగి చదువు వెనుకన వేయన్ 
వాడికి నా పేరా? యని 
గాడిద యేడిచెఁ గదన్న ఘనసంపన్నా!

శంకరునకు గలవు వంక లెన్నొ.

శ్రీ కంది శంకరయ్య గారు ' శంకరాభరణం ' బ్లాగునందు 27-06-2011 న ఇచ్చిన సమస్యకు నా పూరణ.

సమస్య - శంకరునకు గలవు వంక లెన్నొ

ఆటవెలది: 
బూది వలువ, వాని బుద్ధి మనకందదు
జడుడు,మెడను పాము,జటల ధారి
నీరు నెత్తి నుండు, నిటలములో నిప్పు 
శంకరునకు గలవు వంక లెన్నొ.

సుగ్రీవుని యెడమకాలు శునకము గఱచెన్.

శ్రీ కంది శంకరయ్య గారు ' శంకరాభరణం ' బ్లాగునందు 26-06-2011 న ఇచ్చిన సమస్యకు నా పూరణ.

సమస్య - సుగ్రీవుని యెడమకాలు శునకము గఱచెన్.

కందము: 
ఏ గ్రీవుండయితేనేం 
మా గ్రామమునందు కుక్క మహ పిచ్చిదిగా 

ఉగ్రుండగు చదలించగ 

సుగ్రీవుని యెడమకాలు శునకము గఱచెన్.

ఓనమాలు రాని యొజ్జ మేలు.

శ్రీ కంది శంకరయ్య గారు ' శంకరాభరణం ' బ్లాగునందు 26-06-2011 న ఇచ్చిన సమస్యకు నా పూరణ.

సమస్య - ఓనమాలు రాని యొజ్జ మేలు

  

ఆటవెలది:

విద్య నేర్వ వచ్చు విద్యార్ధుల నెడను

ఘోర హింస మరియు గోరి  లైంగి

కముగ బాధ పెట్టు కార్యక్రమములందు

ఓనమాలు రాని యొజ్జ మేలు.

నిప్పున నొక చేరెఁడంత నెత్తురు గాఱెన్.

శ్రీ కంది శంకరయ్య గారు ' శంకరాభరణం ' బ్లాగునందు 25-06-2011 న ఇచ్చిన సమస్యకు నా పూరణ.

సమస్య - నిప్పున నొక చేరెఁడంత నెత్తురు గాఱెన్.

కందము:

నిప్పులు గ్రక్కుచు వెడలగ

నప్పుడు మన రామరాజె యగ్ని కణంబై

చప్పున గాల్చెను రూథర్

నిప్పున నొక చేరెఁడంత నెత్తురు గాఱెన్.

దత్తపది - "అప్పు, కొప్పు, చెప్పు, మెప్పు"

శ్రీ కంది శంకరయ్య గారు ' శంకరాభరణం ' బ్లాగునందు 25-06-2011 న ఇచ్చిన సమస్యకు నా పూరణ.

దత్తపది - "అప్పు, కొప్పు, చెప్పు, మెప్పు"

పై పదాలను ఆయా అర్థాలలో కాకుండా ఉపయోగించి పెరిగిన వంటగ్యాసు ధరలపై

తేటగీతి:

ధరను మేమప్పుడే నల్గి ధరల మరను

చెప్పుకొనలేని బాధకు చేరినాము

నేత! మీకొప్పునే ధర నిట్లు బెంచ?  

మిమ్మునమ్మి చెడుదుముమే మెప్పు డైన.

కమ్మలు మోకాఁళ్ళు దాఁకి ఘలుఘలు మనియెన్

శ్రీ కంది శంకరయ్య గారు ' శంకరాభరణం ' బ్లాగునందు 24-06-2011 న ఇచ్చిన సమస్యకు నా పూరణ.

సమస్య - కమ్మలు మోకాఁళ్ళు దాఁకి ఘలుఘలు మనియెన్

కందము: 

అమ్మగ మారిన సుందరి

బొమ్మగ ముద్దుల నొలికెడి బుడతడి పొట్టన్!

'ఉమ్మ'ని ముద్దులు పెట్టగ

కమ్మలు మోకాఁళ్ళు దాఁకి ఘలుఘలు మనియెన్.

ఐకమత్యమ్ము గలిగించు నధికహాని.

శ్రీ కంది శంకరయ్య గారు ' శంకరాభరణం ' బ్లాగునందు 24-06-2011 న ఇచ్చిన సమస్యకు నా పూరణ.

సమస్య - ఐకమత్యమ్ము గలిగించు నధికహాని. 

తేటగీతి: 

ఉగ్ర వాదుల కనిపెట్టి ఊడ్చ వలయు

ఉగ్రవాదపు సంస్థలే యొకరి కొకరు

సాయమందించు కొన్నచో చాలు - వారి

ఐకమత్యమ్ము గలిగించు నధికహాని.

రండాగమనంబు సేయ రమ్యంబ యగున్.

శ్రీ కంది శంకరయ్య గారు ' శంకరాభరణం ' బ్లాగునందు 23-06-2011 న ఇచ్చిన సమస్యకు నా పూరణ.

సమస్య - రండాగమనంబు సేయ రమ్యంబ యగున్.


అమెరికా లో చదివి తమ స్వగ్రామానికి తిరిగి వస్తున్నపిల్లల్ని తీసుకు రావడానికి స్టేషన్ కి బండి తీసుకు వెళ్తూ తండ్రి అనుకున్న మాటలు... 

కందము:
బండిని తోలుకు పోవలె
మెండగు చదువులు చదివి యమెరికా నందున్
తండా గన, పోరియు పో   
రండాగమనంబు సేయ రమ్యంబ యగున్.

(పోరి,పోరడు = కూతురు,కొడుకు) 
(తండా = కుగ్రామము)  

సన్యాసికి పిల్ల నివ్వ సంబరపడియెన్

శ్రీ కంది శంకరయ్య గారు ' శంకరాభరణం ' బ్లాగునందు 23-06-2011 న ఇచ్చిన సమస్యకు నా పూరణ.


సమస్య - సన్యాసికి పిల్ల నివ్వ సంబరపడియెన్ 

కందము : 


కన్యామణి ప్రేమను గని 
ధన్యత వారిని కలుపగ - తలిదండ్రులె  తా 
మన్యుల నొల్లక  సొగసరి 
సన్యాసికి   పిల్ల నివ్వ సంబరపడియెన్.

(సన్యాసి అను పేరుగల వరుడు అని నా భావం)

మీనాక్షికి కుచములారు మీన శరీరా

శ్రీ కంది శంకరయ్య గారు ' శంకరాభరణం ' బ్లాగునందు 22-06-2011 న ఇచ్చిన సమస్యకు నా పూరణ.

సమస్య - మీనాక్షికి కుచములారు మీన శరీరా

మీనశరీరుడను చిత్రకారునికి చిత్రం యెలా గీయాలో చెప్తూ ... 

కందము : 


ఆనామము తగ్గట్టుగ
కానగ వలె కళ్ళు-యెత్తుగా గీయవలెన్
సోనాక్షికి,కామాక్షికి, 
మీనాక్షికి-కుచములారు మీన శరీరా!

అందవికారమె బ్రతుకున నానంద మిడున్

శ్రీ కంది శంకరయ్య గారు ' శంకరాభరణం ' బ్లాగునందు 22-06-2011 న ఇచ్చిన సమస్యకు నా పూరణ.


సమస్య -  అందవికారమె బ్రతుకున నానంద మిడున్


కందము : 
అందమె ఆనందంబగు 
సుందర భావనలు బెంచు సొగసే; మాపన్ 
పొందుగ కుత్సిత భావన 
లందవికారమె; బ్రతుకున నానంద మిడున్.

ఎలుకలు తమ కలుగులోని కేనుఁగు నీడ్చెన్.

శ్రీ కంది శంకరయ్య గారు ' శంకరాభరణం ' బ్లాగునందు 21-06-2011 న ఇచ్చిన సమస్యకు నా పూరణ.


సమస్య : ఎలుకలు తమ కలుగులోని కేనుఁగు నీడ్చెన్.


కందము : 
  
కలవగ దలిచెను రావణు
దలపడి లంకను హనుమయె దనుజుల గూల్చెన్
కలబడనని నటియింపగ
ఎలుకలు తమ కలుగులోని కేనుఁగు నీడ్చెన్.

త్రాతకు జేజే

బ్లాగు వీక్షకులకు " శ్రీరామ నవమి " శుభాకాంక్షలు

కందము :

దశరథ సుతుడై, బంటుగ

దశబాహుని పంచ ముఖుని దరిజేరిచి యా

దశకంఠుని పరిమారిచి

దశదిశలను ఖ్యాతి గనిన త్రాతకు జేజే !