అమరావతి సాహితీ మిత్రులు
వారం వారం పద్య కవితల పోటీ - 1 లో ప్రశంస పొందిన పద్యాలు.అంశం:సత్యం
శీర్షిక:సత్యము
ఆటవెలది:
సత్యవచన మెపుడు శాంతినే బంచును
మనసు తేలికగును మంచిగలుగు
కల్లలాడ మదిని గందరగోళమే
నరుడు గోలుపోవు నమ్మకమ్ము.
ఆటవెలది:
త్రాడు జూచి పాము దలచుచున్ బెదరకు
త్రాడె యనుచు బాము దరికిబోకు
తెలివితోడ గనగ దెలియును సత్యమ్ము
సాగు జీవనమ్ము శాంతి తోడ.
ఆటవెలది:
మంచినీటి "నుయ్యి" మరిజూడగా "బావి"
మంచి "క్రతువు" నొక్క మంచి "సుతుడు"
వరుస కొకటికొకటి వందగానెక్కువ
మించి "సత్యవాక్కు" మేలుమేలు.
ఆటవెలది:
తీపి బొంకు వలన తీపులే మిగులును
చేదు నిజము పైకి చేదుకొనును
వాక్కునందు శక్తి పదిరెట్లు పెరుగును
పలుక సత్యమెపుడు పదుగురెదుట.
ఆటవెలది:
నిలుచు బ్రహ్మమొకటె నిజముగా సత్యమ్ము
జగతి మిథ్య యనుచు సరిగనెరిగి
తడవకుండునట్టి తామరాకును బోలి
బ్రతుకు నడుపు నరుడు భాగ్యశాలి.
No comments:
Post a Comment