"గోలీ"లు - 48

కందము:

బెట్టును వీడుడు క్రిక్కెట్

బెట్టిం"గుల" మానుడింక విజ్ఞత తోడన్

పుట్టిని ముం"చెడు" "ఛీ"టింగ్

సెట్టింగులు చేతురనుచు చెప్పెను గోలీ!

చెణుకును విసరగ

 మీకు మీ కుటుంబ సభ్యులకు దీపావళి శుభాకాంక్షలు.

సీసము:

చెణుకును విసరగ సీమటపాకాయ

చిలిపిమాటదియగు చిచ్చుబుడ్డి

వాదనమ్మునుజేయ వంకాయ బాంబౌను

మాట మంచిదియైన మరిమతాబు

ముచ్చట్లు దిరుగగా భూచక్రమును బోలు

పరుషవాక్యమెపుడు పాము బిళ్ళ

హద్దుగనని పల్కు హవ్వాయి చువ్వాయి

విష్ణుచక్రమగును వినయ వాక్కు

ఆటవెలది:

మాటవిలువదెలిసి మహిలోన మెలిగిన

వెలుగు జీవితమ్ము కలిమి నిండు

దీని విలువ దెలియ దీపాల పండుగ

నిలచియుండునెపుడు నిజము నిజము.

"గోలీ"లు - 47

 

కందము:

అతి తిండియు నతి నిద్రయు

నతివాగుడు నతిగనాశ లతివ్యాయామం

బతికోపంబతి శాంతం

బతియెందున బనికిరాదననెరా గోలీ!