మీకు అందరికీ "ప్లవ" నామ తెలుగు వత్సర శుభాకాంక్షలు.
కం:
ప్లవనామపు వత్సరమా
నవ జీవనమిమ్మునేడు నయముగనీ మా
నవజాతి యరోగపు వి
ప్లవమును సాధించి జగతి బరగెడునట్లున్.
సీ:
మాస్కు బెట్టుకొనుట మామిడి వగరౌను
చింతవదలియుంట చింతపులుసు
భౌతిక దూరమ్ము బాటింపు కారమ్ము
ప్రీతినింటనెయుంట బెల్లమౌను
చేతులన్ గలుపక జేరుట వేప్పూత
కరముల శుభ్రమ్ము గనగనుప్పు
శిశిరమంతయునిండె చేటుకాలము వచ్చె
వత్సరమంతయున్ భయమునిండె
ఆ.వె:
ఆరుగాగలనివి యాచారముగ గల్పి
యనుసరించ శుభములందగలవు
ఆరుగా కరోన యనెడు రోగపునిప్పు
ప్రతిదినమునుగాది పండుగగును.
