ఘంటసాల పాటల "కందాలు" - 67

  

కందము: 

"పిలిచిన పలుకవు" హాయౌ

చిలిపిగ జవరాల నన్ను జేరగరావా

చెలినీ సొగసేలును జగ

ములనని నెలరేడు గగనమునదాగెననన్.

ఘంటసాల పాటల "కందాలు" - 66

 కందము: 

"పయనించే ఓ చిలుకా"

భయమదిలేకుండ ధర్మ పథమమున సాగన్

నయగారము మరువమనెడు

ప్రియమగునా పాట వినగ వీనులు చూచున్.

ఘంటసాల పాటల "కందాలు" - 65

 

కందము: 

"చెంగావి రంగుచీరా"

కొంగును కొంగును గలుపగ గోరుట వినగా

సంగీతము మది బలుకు ని 

జంగా సరిసరి సరిసరి సరిసరి సరిసా.

ఘంటసాల పాటల "కందాలు" - 64

 

కందము: 

"నారాయణ నీలీలా" 

ప్రేరణ నీదగుచు బుట్టె వీరులహో! యీ

భారతమునననుచును ప్రియ

మారగనే బాడినావు మరిమరి వినగా. 

ఘంటసాల పాటల "కందాలు" - 63

 

కందము: 

"రారా కృష్ణయ్యా" యని 

రారా దీనులను గావ రారమ్మనుచున్

కోరిన వరమిడు వరదుని

చేరువ మాసన్నిధికిని జేర్చితివయ్యా.

ఘంటసాల పాటల "కందాలు" - 62

 

కందము: 

"మానవుడే మహ నీయుడు"

ఆనాడుననాలపించి నట్టిది వినగా

నేనాటికి నూతనమే

మానవునిగ పుట్టితినని మనసుప్పొంగున్.

 

ఘంటసాల పాటల "కందాలు" - 61

 కందము: 

"అమ్మాయే పుడుతుందీ"

అమ్మకులానుండు తానె యచ్చంబనుచున్

కొమ్మను సరసాలాటల

నిమ్ముగ నుడికించు పాట నిక విన హాయౌ.

ఘంటసాల పాటల "కందాలు" - 60

 

కందము: 

"చిన్నారీ బుల్లెమ్మా"

చన్నీటను స్నానములిక చాలను పాటన్

హన్నా!చక్కలిగింతలు

విన్నామా మాకుగలుగు వేమార్లైనన్.  

ఘంటసాల పాటల "కందాలు" - 59

 

కందము: 

"విరిసే కన్నులలో" యను

మెరుపుల యాపాట వినగ మీదట మనసే

మరిమరి చెలినే మెచ్చుచు

మురియును బృందావనముల "పో" వద్దనులే. 

"ఆ నంద" మూరి

 

సీసము:

రామకృష్ణులకును  రారాజు రావణ

పాత్రలకును పేరు బడ్డవాడు 

వెండితెర బసిడి కొండగా వెలుగుచు

నటసార్వభౌముడై నట్టివాడు 

ఆంధ్రులు మరచిన యాత్మగౌరవమునె

నరములన్ నింపిన   నాయకుండు 

ప్రజల మేలునుగోరి  పార్టీని స్థాపించి 

ప్రఖ్యాతి గన్నట్టి పాలకుండు

 

తేటగీతి: 

నందమూరిని జూడ నానందమూరు

నటనయే పరవశమున  నటనమాడు.

తెలుగు దేశమ్ము మెచ్చిన తేజమితడు

అన్న యీతడు పేదలకన్న మితడు.

ఘంటసాల పాటల "కందాలు" - 58

 కందము: 

"కనులు కనులు కలిసెను" పిలి

చెను మరి కన్నె వయసు తెలిసెనసలు చెలిదౌ

మనసని, విసురులు పైపై

ననుచును సరిబాడినట్టి యాగీతమహో!

. 

ఘంటసాల పాటల "కందాలు" - 57

 

కందము: 

"మరదలుపిల్లా"యనుచును

మరిమరి యుడికించు పాట, మహ కవ్వింపుల్

కొరకొర కోపములోనన్

సరిబలె యందము గలదని చక్కగ సాగున్.