తల తోక

 నిన్న 5-2-2024 న "సాహిత్యం" గ్రూప్ నందు ఇచ్చిన సమస్య "తలతోక లేనివేమనపద్యాలు" కు నా పూరణ.

ఆటవెలది:

ఆటవెలదులందు నందముగాజెప్పె

నీతి, జనులు దెలియ నిజముగ, కల

వె? తలతోక లేనివేమనపద్యాలు

తలయె "విశ్వ", తోక తలప "వేమ"

దేవుఁడు లేనట్టి గుడియె తీర్చును గోర్కెల్

 8-8-2023 న "శంకరాభరణం"నందు ఇచ్చిన  సమస్యకు నా పూరణ.

ఒక చోరుని స్వగతము.

కందము: 

పోవలె,శిఖరాగ్రముపై

కావలి లేనట్టి కోట కలదులె, నిధులే

కావలె, త్రవ్వగ నట నా 

దేవుఁడు లేనట్టి గుడియె తీర్చును గోర్కెల్.

సమస్య: జమునఁ జూడ విజయ శాంతి దక్కె.

 

చెల్లి విజయతో....

ఆటవెలది:

మనసు నందు "శాంతి" మసకబారినవేళ 

తీర్థయాత్రకొరకు తీరు వెడల

నచట బారుచున్న యందాల నదియగు 

జమునఁ జూడ విజయ! "శాంతి" దక్కె.

సమస్య:కొట్టెడి భార్యపై మిగుల కూరిమిజూపును భర్త యెప్పుడున్

 

ఉత్పలమాల:

తిట్టిన వేళనేడ్వకనె తిండిని బెట్టుచు మొండిపట్టునే

బట్టక చీరెసారెలని బట్టలకేడ్వక బంధువర్గమున్

గుట్టుగనాదరించి పతి గూడుచు జెప్పినవాటికెల్ల నూ

కొట్టెడి భార్యపై మిగుల కూరిమిజూపును భర్త యెప్పుడున్.

తేరాదాదా హమారదేతా గంగన్

 గతంలో "పద్యకవన వనం"గ్రూపు లో

సమస్య - రాము దూపాటి *

* తేరాదాదా హమారదేతా గంగన్! *

**********************************

* పూరణ - గోలి శాస్త్రి *

***********************

కందము:

లారే! ప్యాసా హూఁ మై

తేరాదాదా హమారదేతా గంగన్?

పోరా! జల్దీ థంసప్

తేరాదా, దాహ మారదే తాగంగన్!

**********************************

కోమలి తలమీద రెండు కొమ్ములు వుట్టెన్

శంకరాభరణం బ్లాగునందు 5-7-2020 న ఇచ్చిన సమస్యకు నా పూరణ.

సమస్య: కోమలి తలమీద రెండు కొమ్ములు వుట్టెన్

కందము: 
ప్రేమగ పూతన విషమును 
ధీమాగా నీయనెంచ త్రెక్కొన హరియే
భూమినిబడ నిజరూపము   
కోమలి తలమీద రెండు కొమ్ములు వుట్టెన్. 

పయ్యెదనున్ లాగువానిఁ భామిని మెచ్చెన్.

శంకరాభరణం బ్లాగునందు 4-7-2020 న ఇచ్చిన సమస్యకు నా పూరణ.

సమస్య:పయ్యెదనున్ లాగువానిఁ భామిని మెచ్చెన్.

కందము: 
శయ్యను నిద్దురనుండగ
చయ్యన తన చెంతజేరి చన్నులకొరకై 
కుయ్యనుచు మూల్గి పాలకు 
పయ్యెదనున్ లాగువానిఁ భామిని మెచ్చెన్.

సంతానముఁ గాంచి మురిసె సన్యాసి గడున్.

శ్రీ కంది శంకరయ్య గారు 5-03-2020 న ఇచ్చిన సమస్యకు పూరణ.

సమస్య - సంతానముఁ గాంచి మురిసె సన్యాసి గడున్.

కందము: 
చింతామణి గొడ్రాలికి 
చింతను దీర్పంగ నిచ్చె చిటికెడు బూదిన్ 
వింతగ కవలల గనగా 
సంతానముఁ గాంచి మురిసె సన్యాసి గడున్.

బడికిఁ బోవువాఁడు పనికిరాఁడు.

శ్రీ కంది శంకరయ్య గారు 27-12-2019 న ఇచ్చిన సమస్యకు పూరణ.

సమస్య: బడికిఁ బోవువాఁడు పనికిరాఁడు.

ఆటవెలది:  
ఇన్నినాళ్ళు నేను వేధించిబంపితి
కూలి పనులకొరకు,కూలిపోవు
వాని భవితగాన వరుసరేపటినుండి 
బడికిఁ బోవు, వాఁడు పనికిరాఁడు.

కాంతకు వీడ్కోలు వలుకఁగాఁ దగు నేఁడే

శ్రీ కంది శంకరయ్య గారు 31-12-2019 న ఇచ్చిన సమస్యకు పూరణ.

సమస్య: కాంతకు వీడ్కోలు వలుకఁగాఁ దగు నేఁడే

 

కందము:

ఇంతగ ట్వంటీ నైంటీన్  .

నంతంబగునేడు, వచ్చు నాట్వంటీల్ రెం

డింతలుగ, మది దలచి  నర   ,

కాంతకు, వీడ్కోలు వలుకఁగాఁ దగు నేఁడే.

నన్నయ కవివరుండు తెనాలివాఁడు.

శ్రీ కంది శంకరయ్య గారు 01-10-2019 న ఇచ్చిన సమస్యకు పూరణ.


పెద్దసన్మానమతనికి ప్రియముతోడ 
జేసినారుగ కవిగాను  వాసికెక్క
పొగడియిచ్చిరి బిరుదమ్ముపో "యభినవ
నన్నయ"- కవివరుండు  తెనాలివాఁడు. 

కుజనులు క్రూరాత్ములు గద గుంటూరు జనుల్.

శ్రీ కంది శంకరయ్య గారు 17-09-2019 న ఇచ్చిన సమస్యకు పూరణ.

సమస్య - కుజనులు, క్రూరాత్ములు గద గుంటూరు జనుల్. 


కందము: 
సుజనులకే సుజనులు మరి
గజగజ వణికింతురు గన  కల్మష నరులన్  
నిజముగ ననుకొందురు మది
కుజనులు, క్రూరాత్ములు గద గుంటూరు జనుల్.  

పువ్వులలో జ్వాల లెగసి బొబ్బలు పుట్టెన్.

 కందిశంకరయ్య గారు 14 - 08 - 2019 న ఇచ్చిన
సమస్యకు నా పూరణ

సమస్య - పువ్వులలో జ్వాల లెగసి బొబ్బలు పుట్టెన్.

కందము: 
దవ్వున నుండెను పతియే 
యివ్వల సతి మల్లెపందిరెడుటనె, మీదన్ 
రివ్వున గాలికి బడగా   
పువ్వులలో జ్వాల లెగసి బొబ్బలు పుట్టెన్.

మూఁడేఁడుల పిల్లకొక్క పుత్రుఁడు గలిఁగెన్

శ్రీ కందిశంకరయ్య గారు 07 - 08 - 2019 న ఇచ్చిన
సమస్యకు నా పూరణ

సమస్య - మూఁడేఁడుల పిల్లకొక్క పుత్రుఁడు గలిఁగెన్


కందము: 
మూడైదుల చదువాపెను
మూడార్లకు పెండ్లిగాగ ముచ్చట దీరన్
మూడేండ్లు గడచిపోయెను 
మూఁడేఁడుల పిల్లకొక్క పుత్రుఁడు గలిఁగెన్. 

తొమ్మిదిలో నొకటిఁ దీయఁ దొయ్యలి పదియౌ

శ్రీ కందిశంకరయ్య గారు "శంకరాభరణం" బ్లాగునందు 26 - 07 - 2019 న ఇచ్చిన
సమస్యకు నా పూరణ

సమస్య - తొమ్మిదిలో నొకటిఁ దీయఁ దొయ్యలి పదియౌ 

 కందము: 
కమ్మని యిరువది పండ్లవి
అమ్మాయీ నీకునిత్తు నందున సగమున్ 
ఇమ్ముగ జేతను బట్టితి
తొమ్మిది, లోనొకటిఁ దీయఁ దొయ్యలి పదియౌ!

మకరమ్మును ముద్దులాడె మగువ కడుఁ దమిన్.

శ్రీ కందిశంకరయ్య గారు "శంకరాభరణం" బ్లాగునందు 10 - 05 - 2019 న ఇచ్చిన
సమస్యకు నా పూరణ

సమస్య - మకరమ్మును ముద్దులాడె మగువ కడుఁ దమిన్.

కందము: 
చకచక గోరింటాకును
టకటక నరచేత గడిగి "టటడా"మ్మనుచున్  
సకలమ్మెరుపని తన వా 
మకరమ్మును ముద్దులాడె మగువ కడుఁ దమిన్.

కుంజర యూధంబు దోమ కుత్తుక జొచ్చెన్.

శ్రీ కందిశంకరయ్య గారు "శంకరాభరణం" బ్లాగునందు 8 - 05 - 2019 న ఇచ్చిన
సమస్యకు నా పూరణ

సమస్య - కుంజర యూధంబు దోమ కుత్తుక జొచ్చెన్.

కందము:
మంజుల "జూ" లో దిరుగుచు 
రంజుగ  "నెల్ఫెంట్సు గ్రూపు" రయమున రాగా 
గుంజెను "సెల్ఫోన్ ఫోటో" 
కుంజర యూధంబు దోమ కుత్తుక జొచ్చెన్.

రవికయే చాలుఁ గద చీర "రమణి" కేల

శ్రీ కందిశంకరయ్య గారు "శంకరాభరణం" బ్లాగునందు 26 - 04 - 2019 న ఇచ్చిన
సమస్యకు నా పూరణ

సమస్య -  రవికయే చాలుఁ గద చీర "రమణి" కేల


తేటగీతి:
చీర గట్టదు "లే" భామ జీన్సు  ప్యాంటు
వేయు, తాంబూల మందున వేయిమీద 
నూట పదహార్లు  తోడుగా  వేడ్కమీర 
రవికయే చాలుఁ గద చీర "రమణి" కేల? 

వస్త్రములన్ త్యజించుచు ప్రపంచహితంబును గూర్చ భావ్యమౌ

"ప్రజ - పద్యం" ఫేస్బుక్ గ్రూప్ లొ  20-4-2019 న ఇచ్చిన సమస్యకు నా పూరణ. 

సమస్య -  వస్త్రములన్ త్యజించుచు ప్రపంచహితంబును గూర్చ భావ్యమౌ

ఉత్పలమాల: 
వస్త్రములిన్నియిన్ని మరి భామలకెందుకు పెట్టె నిండుగా
దస్త్రము గట్టినట్లు తెగ దాచిన చిమ్మటకాటు జిన్గుగా 
వస్త్రములేని పేదలకు బంచగ కొన్నిటి గొన్నవాటినే 
వస్త్రములన్ త్యజించుచు ప్రపంచహితంబును గూర్చ భావ్యమౌ.

సీతాపతి యనఁగఁ జంద్రశేఖరుఁడు గదా

శ్రీ కందిశంకరయ్య గారు "శంకరాభరణం" బ్లాగునందు 28 - 02 - 2019 న ఇచ్చిన
సమస్యకు నా పూరణ


సమస్య - సీతాపతి యనఁగఁ జంద్రశేఖరుఁడు గదా

కందము: 
ఖ్యాతినిగనె సతికిని తా
ప్రీతిగ సగమిచ్చి మేను ప్రియ ధవుడగుచున్
ఏతావాతా దేలెను
సీతా! పతి యనఁగఁ జంద్రశేఖరుఁడు గదా!