శ్రీ గజానన!

 ఓం శ్రీ మహా గణపతయే నమః 

మీకు మీ కుటుంబ సభ్యులకు అందరికీ వినాయక చవితి శుభాకాంక్షలు.

సీసము:  

శ్రీగజానన! బుద్ధి, సిద్ధినాథుడవయ్య!  

పరగ నా గణపతి పదవి నీది 

మంత్రమందు మొదటి మహిమాక్షరంబైన

ప్రణవమై వెలుగొందు వాసి నీది   

కనులు చిన్నవిగాని కరుణనే పెద్దగా 

మాపైన కురిపించు చూపు నీది 

మరి శ్రద్ధగా నీవె మాగోడులన్ విన 

చేటలంతగనున్న చెవులు నీవి

సకలవిద్యలనెల్ల సంప్రీతినందించ 

కోరిదాచిన పెద్ద కుక్షి నీది 

ఆశీస్సులీయగా, నణగంగ ద్రొక్కగా 

గరిమ గల్గినయట్టి కరము నీది  

పసుపు ముద్దనుజేసి భక్తితో రమ్మన

సరగునన్ వచ్చెడి జాలినీది  

గరికనింత నిడుచు వరములన్ గోరిన 

ఇలను జనులకిచ్చు ఎలమి నీది  

   

ఆటవెలది:  

అట్టి నిన్ను మదిని యర్చించి వేడగా  

విజయమందు, నన్ని విద్యలందు

ఉజ్వలంపు భావి యొనగూరునని లోక        

విదితమనుచు దెలిసి వినుతి జేతు.