ఓ! యువకా!
సీసము:
"గంజాయి" దమ్ముతో "నెంజాయి" జేయుచు
నందున స్వర్గమ్ము నందబోకు
"కొకెయిన్"ను చాటుగా గోరుచు కొని, వాడి
మత్తునందున మాటు మసలబోకు
ఆ "హెరాయిన్ను"నే హాయిగా బొందుచు
మైకమ్ము నందున మ్రగ్గబోకు
"బ్రౌనుషుగరు" నింక వదలలేననుచును
మంపున తెలివినే మరువబోకు
తేటగీతి: :
పాడు "బెట్టింగు" జూదమ్ము లాడబోకు
దుష్ట సాంగత్య మందున దూరబోకు
ఇట్టి నీతుల బెడచెవి బెట్టబోకు
విననిచో నీవగుదువుర! పెద్ద "బోకు".
కందము:
"సోషల్ మీడియ" లోనన్
భేషుగనే పేరుబొంది "ఫేమ"స్సవగా
"ఛీ!షిట్! షే"మను "పోస్టులు"
తోషముతో బెట్టవలదు దోషము సుమ్మా!
కందము:
బూతుల బల్కకు మోరీ!
రోతగ నీనోట, వలదురో యగు "మోరీ"
“ట్రూతు”ను దెలియుచు ప్రీతిగ
రీతిగ మాట్లాడు వాడె “రియలగు హీరో”.
ఓ! యువతీ!
కందము:
చిరుగుల దుస్తుల "ఫ్యాషన్"
చిరు "గులగా" మారె నేడు "ఛీఛీ" యనగా!
సరి "రోడ్డు"నందు గుంతలు
మరి "డ్రస్సు"కు కంతలుంట మంచిది కాదే!
కందము:
"మేలూ" "ఫిమేలు" తేడా
లేలా యని "సేప్టి"లేక నేగుట మేలా?
పోలిక "మేల్" కన ముల్లే
చీలుగ నరిటాకు "ముల్లె" "సిస్టర్" వినవే!
సీసము:
తోడేళ్ళు చిరుతలు తొంగి చూచుచునుండు
దొరికినంతనె బట్టి కొరికివేయు
వగలుజూపుచు బ్రీతి "వల"రాజు సాలీడు
చిక్కబుచ్చు కొనగ జేరబిలుచు
బండగా నున్నట్టి కొండచిలువగాడు
సూటిగా దరిజేర నోటబట్టు
నక్కిమూలననున్న నక్క జిత్తులమారి
మోసమ్ముతో నిన్ను ముంచివేయు
ఆటవెలది:
లేడి వంటి దాన లేప్రాయముల చాన
గండములవి నీకు కలవు శాన
కామ మృగములిట్టి కాన నుండును గాన
జాగరూకత గని సాగవలయు.
ఓ! యువతా!
చంపకమాల:
చదువులు నేర్వమంచు సరి చక్కని "కాలెజి" లందు జేర్చుచున్
మృదువుగ జెప్పిపంపగను మీరిన వేడ్కను తల్లిదండ్రులే
హృదయమునందు వారినిక నెంతయు దల్పక పిల్లలింతయున్
చదవక "లేజి" గా దిరిగి "చాటు షికారులు" జేయ భావ్యమా?
ఉత్పలమాల:
మీరిన ఖర్చు జేయుచును మిత్రులతోడను “పార్టి, పబ్బులన్”
జేరుచు నుండు వారు పెను చీడర యింటికి, తల్లి దండ్రికిన్
భారము కొంతదీర పలు పద్ధతులందున "పార్టుటైము జాబ్స్"
తీరుగ జేసి విద్యలను తేకువ నేర్చెడు వారు ధన్యులౌ.
సీసము:
సాంకేతికత కత్తి సరిజూచి వాడుచు
విహరించు విజ్ఞాన వీధులందు
రాజకీయములందు రాణకెక్కుచు నీతి
పాలనన్ బంచుమా పదవులందు
బహువిధంపు కళలు బాగుగానేరిచి
భాసించు చుండుమా వసుధనందు
అంకుర సంస్థల నవియెన్నొ స్థాపించి
ఘనముగా నిల్పు మాకాశమందు
ఆటవెలది:
ఓర్మి, బుద్ధి, తెగువ నోటమి నోడించి
జయము లందవలయు జగతినందు
యువత తేజమొప్పి యుల్లాసముగనుండ
నుత్సవములు నిండు నుర్వినందు.
ఉత్సాహము:
తల్లిదండ్రి గురువులందు తగిన భక్తి జూపుడీ
ఉల్లమందు సాటివారి నొక్కరీతి గాంచుడీ
ఎల్లలేని జ్ఞాన పథము నెరిగి వేడ్క సాగుడీ
వెల్లువగుచు యువత శక్తి విశ్వమంత నిండగా.
కందము:
నిన్నకు రేపనుదానికి
పన్నుగ నిలుచుండు గొప్ప వారధి, యువతన్
దన్నుగ నిలుపక నుండిన
వెన్నెముకే లేక భావి వెలవెల బోవున్.
ఆటవెలది:
యువత శక్తి జూడ నురకలెత్తెడి నది
వదలివేయ నదియు వ్యర్ధమగును
ఆనకట్ట తోడ నదుపుజేయుచు వాడ
బహుళ ఫలములందు భవిత వెలుగు.
No comments:
Post a Comment