కందము:
గ్రీట్సులకున్ ముచ్చట్లకు
మేట్సుల, కాఫీసులకును మేలగునిదియే
హ్యాట్సాఫ్ నే చెప్పెదమిక
“వాట్సప్” కే గ్రూపు గాను వందన మనుచున్.
సీసము:
పంపగా వచ్చులే వాయిస్సు మెస్సేజి
సెల్ఫీలు మరియెన్నొ చిత్రములను
చూపగా వచ్చులే ఛూజింగు వీడియోస్
లైవులో ప్రోగ్రాము మూవి వోలె
మాట్లాడ వచ్చులే మనవారితోగూడి
కబురులెన్నేనియు కనులగనుచు
దింపగా వచ్చులే దిక్కౌచు నేరికిన్
కోరు లొకేషన్ను చేర బంపి
తేటగీతి:
నేర్వగా వచ్చు కళలను నేర్పవచ్చు
మంచిగా జేరి గ్రూపుల మనమె జేసి
చెప్పగా వచ్చు నేడికన్ సెల్లునందు
గొప్ప మాధ్యమ"మాయె" వాట్సప్పునిజము.
తేటగీతి:
ఉప్పులేనట్టి కూరనే యొప్పుకొనును
అవసరమ్ముల కొన్నింటి నవతలిడును
నొప్పులెన్నేని బాధించ నోర్చుకొనును
సైపలేడుర నరుడు వాట్సప్పు లేక.
కందము:
అలవాటైతే ప్రీతిగ
నల వాట్సప్పును వదలరహా! స్మార్ట్ ఫోనున్
గలవారలు, డే అండ్ నైట్
కలవారలు లేనివారు కనెద రడిక్టై.
కందము:
ఎన్నుచు మాయల మారులె
నిన్నున్ బడవేసి వలను నిండుగ ముంచన్
కన్నింగ్ ఛాట్లను జేతురు
చిన్నా! అన్నోను కాల్సు ఛీ! ముట్టకుమా!
తేటగీతి:
"గుడ్డుమార్నింగు" వద్దురా "గుడ్డునైటు"
"టేస్టు" లేనట్టి పోస్టులు "వేస్టు" గదర!
"ఎత్తిపోతల" పథకమ్ము నెత్తివేయి
"సరస ఫలముల" బంచు వాట్సప్పు మేలు.
No comments:
Post a Comment