తెలుగు నేలల సంక్రాంతి

మీకు, మీ కుటుంబ సభ్యులు అందరికీ మకర సంక్రాంతి శుభాకాంక్షలు.

సీసము:

భోగిమంటల వెల్గు భువియంత నిండగా  

ముగ్గు, గొబ్బిల శోభ ముసరుచుండు 

గంగిరెద్దులగంతు ఘల్ ఘల్లు మ్రోగగా 

హరిదాసు కీర్తనల్ హాయిగొలుపు

గాలిపటములెన్నొ కనువిందు జేయగా 

కోలాటములదర గొట్టుచుండు

పంటలందిన రైతు వాత్సల్యమొప్పగా    

పసుల పూజలుసల్పి పరవశించు

తేటగీతి: 

మంచు సోయగముదయమున్ మించి పోగ

ఉత్తరాయణ కాలమ్ము యుర్వి బరగు

బంధువర్గముతో యిళ్ళు సందడవగ 

తెలుగు నేలల సంక్రాంతి తేజమలరు.

---గోలి.